Jan en Theo van de ABC vreug’n mie eind oktober um Ridder te wödd’n. Noadat ik ok nog joa har zegt, dach’n ik “wat he’k mie noe weer op ’n hals haalt!!”. Gelukkig wol Theo Sanderink mien adjudant wödd’n. Ik ken mien adjudant good, want wie hebt joarenlang bie de Keistenenbloazers spölt.
In de moand’n veur de opkomst hebt Theo Sanderink en ik vaak bie mekaar zett’n. Mooie tied, gezellig ok, en gin één dee wet da’j de ridder en de adjudant van 2010 bint. Met de vrouwleu bint wie natuurlijk oetgebreid oet ett’n west bie de beste Chinees van Nederland. Ie mut toch wat van ‘t thema wett’n? Gelukkig konn’n wie met mes en voark ett’n, want aans ha’w niks binn’n kreg’n!
De oavend van de opkomst begun a good. “Ie wödt toch Ridder?” Ach, dat hebt ze andere joar’n ok wa es zegt. En volgens mie zeit ze dat tegg’n iedereen! Met de bloazers hebt wie rustig (ik nig!!) wat nummers spölt tut de Kei binn’n kwam. Toen mien zwoager Herman oet ‘n kei kwam, wus gin één wel of hee was. “Wie wilt ne Ridder den wie kèènt!” wödd’n d’r schreeuwt. Ik vun ’t geweldig, mer de veurpret was wa ofloop’n. Noe begun ’t echte weark.
De opkomst was ’n mooi feest, helaas zonder mien adjudant Theo. Noa ’t feest bie Cor en Rita in de Residentie he’w nog ’n paar eier bakk’n bie oons in hoes. Theo SL en Gerard Krabbe hebt zich de haand’n zoawat kapot bakk’n. Het was ‘n prachtig feestje tut in de vrogge uur’n. Een prachtig begin van de carnavalsperiode.
Ik hop dat iedereen oet Aogel Carnaval koomp vier’n. Wie wokt d’r op!
